Miss Supranational 2013 ပြိုင်ပွဲမှာ Title ဆု ၄ ဆု ရခဲ့တဲ့ ခင်ဝင့်ဝါ (ဓာတ်ပုံ – ခင်ဝင့်ဝါ facebook မှ)“ဒီပြိုင်ပွဲကို ဝင်ပြိုင် ပြီးကတည်းက သမီးမှာ တခါမှ မကြုံဘူးတဲ့ အတွေ့အကြုံ အသစ်တွေလည်း ရခဲ့ပါတယ်။ မြန်မာ ပရိသတ်တွေ ပေးတဲ့ ဆုကိုလည်း တန်ဖိုး အရမ်းထားပါတယ်။ ဒါကြောင့် မြန်မာ နိုင်ငံတွင်းမှာ တကယ်လိုအပ်နေတဲ့ ဒေသတွေ၊ တကယ်လိုအပ်နေတဲ့ လိုအပ်ချက်တွေဆီကို ကိုယ်တိုင်သွားပြီး လှူမှာပါ။ နေရာတွေကိုတော့ အခု အချိန်မှာ အတိအကျ မပြောနိုင်သေးတာ ခွင့်လွှတ်ပါ” လို့ အသက် ၁၉ နှစ်အရွယ် Miss Myanmar ခင်ဝင့်ဝါက ပြောပါတယ်။
ဒီနှစ် ထဲမှာ တခြား Miss ပြိုင်ပွဲတွေ ယှဉ်ပြိုင်ဖို့ မရှိသေးတဲ့ ခင်ဝင့်ဝါဟာ ဘီလာရုစ် မှာကျင်းပတဲ့ Miss Supranational 2013 ပြိုင်ပွဲမှာMiss Internet၊ Most Beautiful Girl in the World၊ People Choice Award နဲ့ Face of Miss Supranational စတဲ့ ဆုလေးဆု ဆွတ်ခူးခဲ့တာ ဖြစ်ပါတယ်။ သူ့အနေနဲ့ အနုပညာ အလုပ်တွေကို ဇောက်ချ လုပ်သွားမှာ ဖြစ်သလို၊ ဒုတိယနှစ် ရုက္ခဗေဒ တက်နေတာ ဖြစ်တဲ့အတွက် ပညာရေး ဘက်ကိုလည်း အားမလျှော့ဘဲ ဆက်ကြိုးစားသွားမယ်လို့ သိရပါတယ်။
နိုင်ငံတကာနဲ့ ပတ်သက်တဲ့ အတွေ့အကြုံ၊ ပညာရပ်တွေကိုလည်း ဆက်လက် ဆည်းပူးမှာဖြစ်သလို၊ လူမှုရေး လုပ်ငန်းတွေ၊ ပရဟိတ လုပ်ငန်းတွေမှာလည်း အချိန်ပေး ဆောင်ရွက်မှာဖြစ်တယ်လို့ ဧရာဝတီ သတင်းကနေ တဆင့် သူ့ ပရိသတ်ကို ပြောလာပါတယ်။
ကြမ်းတမ်းတဲ့ ဘဝခရီးကို သူ့အနေနဲ့ အေးအေးချမ်းချမ်းပဲ ဖြတ်သန်းပြီး နိုင်ငံ အတွက် ဂုဏ်ယူနိုင်တဲ့ သူဖြစ်အောင် ကြိုးစားမယ်လို့ ခင်ဝင့်ဝါက ဆိုပါတယ်။
“သမီးကတော့ ဘဝမှာ ရိုးရိုးသားသားနဲ့ အေးအေးချမ်းချမ်းပဲ ဖြတ်သန်းချင်ပါတယ်။ ညီမ ဝါသနာပါတဲ့ အနုပညာနဲ့ လူမှုရေးတွေကို တွဲပြီးလုပ်သွားချင်တယ်။ အားလုံးကိုလည်း ငြိမ်းချမ်းစေချင်ပါတယ်” လို့ သူက ပြောပါတယ်။
နိုင်ငံကိုယ်စားပြု Miss တယောက်အနေနဲ့ ကိုယ်စွမ်းဉာဏ်စွမ်း ရှိသလောက် ကြိုးစားပြီး နိုင်ငံကို အကျိုးပြုပေးသွားမှာ ဖြစ်တယ်လို့ ခင်ဝင့်ဝါက ဆက်ပြောပါတယ်။
လက်ရှိမှာတော့ ခင်ဝင့်ဝါဟာ ဂျာနယ်တွေ၊ မဂ္ဂဇင်းတွေ အတွက် အလှဓာတ်ပုံတွေ ရိုက်ကူးပေးနေရတဲ့ ကိစ္စတွေနဲ့ မအားလပ်အောင် ဖြစ်နေတယ်လို့ သိရပါတယ်။
www.mmdailystar.com