နိုင်ငံတော်သမ္မတ ဦးသိန်းစိန် ပြင်သစ်-မြန်မာ ချစ်ကြည်ရေးအဖွဲ့နှင့် ယူနက်စကို ညွှန်ကြားရေးမှူးချုပ် တို့အား လက်ခံတွေ့ဆုံ

ပါရီ   ဇူလိုင် ၁၈

ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးသိန်းစိန်သည် ပြင်သစ်-မြန်မာ ချစ်ကြည်ရေးအသင်း ဥက္ကဋ္ဌ Mr. Francois - Michel LAMBERT အား ဇူလိုင် ၁၇ ရက် ဒေသစံတော်ချိန် ညနေ ၄ နာရီ ၁၅ မိနစ်တွင်  ခေတ္တတည်းခိုသည့်  Raphaen Hotel ၌ လက်ခံတွေ့ဆုံသည်။

ထိုသို့တွေ့ဆုံရာတွင် မြန်မာနိုင်ငံတွင်လည်း မြန်မာ-ပြင်သစ် ချစ်ကြည်ရေးအသင်း ဖွဲ့စည်းနိုင်ရေး၊ ပညာရေးကဏ္ဍတွင် ပြင်သစ်နိုင်ငံမှ အစိုးရမဟုတ်သော အဖွဲ့အစည်းများ၊ ပါဝင်ကူညီဆောင်ရွက်နိုင်ရေး၊ ရှေးဟောင်းယဉ်ကျေးမှု အမွေအနှစ်များ ထိန်းသိမ်း ဆောင်ရွက်ရေးနှင့် အပြန်အလှန် ယဉ်ကျေးမှုဖလှယ်ရေး ကိစ္စရပ်များကို ဆွေးနွေး ခဲ့ကြသည်။

ထို့နောက် နိုင်ငံတော်သမ္မတ ဦးသိန်းစိန်သည် ယူနက်စကို ညွှန်ကြားရေးမှူးချုပ် Mrs. Irina Bokova အား ဒေသစံတော်ချိန် ညနေ ၅ နာရီခွဲတွင် အဆိုပါဟိုတယ်၌ လက်ခံတွေ့ဆုံသည်။

ယင်းသို့ တွေ့ဆုံရာတွင် ပျူမြို့ဟောင်း(၃) ခုအား ကမ္ဘာ့ယဉ်ကျေးမှု အမွေအနှစ် မြှင့်တင်နိုင်ရေး၊ မြောက်ဦးမြို့အပါအဝင် ရခိုင်ပြည်နယ်ရှိ ရှေးဟောင်းအမွေအနှစ်များ ထိန်းသိမ်းနိုင်ရေး၊ တိုင်းရင်းသားများ၏ ယဉ်ကျေးမှု ဓလေ့ထုံးစံများကို ကာကွယ် ထိန်းသိမ်းနိုင်ရေး၊ ရန်ကုန်မြို့တော်ရှိ ရှေးဟောင်းအဆောက်အဦများ ပြုပြင်ထိန်းသိမ်းရေး၊ ပညာရေးကဏ္ဍအဆင့် မြှင့်တင်ရေးနှင့် အာဆီယံ-ယူနက်စကို ပူးပေါင်း ဆောင်ရွက်ရေး ကိစ္စရပ်များကို ဆွေးနွေးခဲ့ကြသည်။

တွေ့ဆုံပွဲများသို့ နိုင်ငံတော်သမ္မတနှင့်အတူ ပြည်ထောင်စုဝန်ကြီး ဒုတိယဗိုလ်ချုပ်ကြီး သက်နိုင်ဝင်း၊ ဦးဝဏ္ဏမောင်လွင်၊ ဦးစိုးသိန်း၊ ဦးမြတ်ဟိန်း၊ ဦးဝင်းရှိန်၊ ပြည်သူ့လွှတ်တော် နိုင်ငံသားများ၏ မူလအခွင့်အရေး၊ ဒီမိုကရေစီအရေးနှင့် လူ့အခွင့်အရေးဆိုင်ရာ ကော်မတီဥက္ကဋ္ဌ ဦးဌေးဦး၊ ဒုတိယဝန်ကြီးများ၊ မြန်မာသံအမတ်ကြီးနှင့် ဌာနဆိုင်ရာ အကြီးအကဲများ တက်ရောက်ကြသည်။